- Bosh (sahifa)
- Xabardor boling
- Yangiliklar
- Ўзбекистон-Россия: Оёқсиз қонга беланган ўзбек муҳожири ким эди?
Ўзбекистон-Россия: Оёқсиз қонга беланган ўзбек муҳожири ким эди?
24 август куни ўзбекистонлик муҳожир бир тўпиқсиз, қонга беланган ҳолда касалхона эшиги ёнига ташлаб кетилган.
Оёқсиз қонга беланган муҳожир ким эди?
Санкт-Петербургдаги 33-шифохона ходимлари беҳуш муҳожирни дарҳол жонлантириш бўлимига жойлаштириб, операция қилишади.
Майдаланиб гўштга айланган оёқ қолдиқлардан тозаланиб, ўралади. Беморнинг ҳушига келиши учун зарур тиббий ёрдам кўрсатилади.
Эртаси куни ўзига келган муҳожирнинг кимлиги аниқланади: у Россияга ишлаш учун келган наманганлик 38 ёшли Ғулом Пўлатов бўлиб чиқади.
Би-би-си Ўзбек хизмати айни пайтда оғир аҳволда қолаётган Ғулом Пўлатов билан боғланишга муваффақ бўлди.
- Ўтган йили август ойида ишлаш учун Петерга келганман. Чустликман, 3 та болам бор. Тирикчилик учун келиб ҳужжат қилдим, ишга кирдим. Биринчи иш жойим бир ярим ойда ёпилди. Кейин ўртоқларим орқали Колпинодаги цехга ишга кирдим.
Ўша куни ишлаётган жойимда дастгоҳ оёғимни майдалаб кетди, - дейди Ғулом Пўлатов Би-би-сига.
Маълум бўлишича, кўп қон йўқотиб ҳушдан кетган ишчига ўша ердаги ҳамкасблари такси чақиришган ва касалхонанинг қабул бўлими эшиги ёнига ташлаб кетганлар.
Айни пайтда шифохонада қолаётган муҳожир Ватанга қайтиш учун ўзбекистонликлардан кўмак сўрамоқда.
«На борадиган жойим ва уйга қайтишга пулим бор»
Муаллифлик ҳуқуқи BBC UzbekBBC UZBEK
ВИДЕО: https://youtu.be/TaNX-iPSzzE
«Ойликларим қолиб кетди, нарсаларим ҳам иш жойимда қолган. Ўша цехнинг ўзида яшаб ишлардик. Шифохонадан чиқсам, на борадиган жойим ва на уйга қайтишга пулим бор. Иш берувчим мен билан алоқани узган. Илтимос, ёрдам беринглар» - дея Би-би-си учун юборган видеосида юртдошларига мурожаат қилди муҳожир.
Ғулом Пўлатовнинг ҳолидан биринчилардан бўлиб Санкт-Петербургдаги "Migration78SPb" миграция-адаптация марказининг раҳбари Илгиза Якшибаева хабардор бўлган ва унинг ҳақ-ҳуқуқлари ҳимояси учун ҳаракат қилмоқда.
- Вазиятни ўрганиб чиқдим: Ғулом ака пластикларни қайта ишлаш корхонасида ишлаган. У бошқараётган ускуна ёмон ишлаганидан материал тиқилиб қолган. Ғулом ака оёғи билан материални туртганида ускуна оёқни чайнаб кетган. Биз бир нарсага ҳайронмиз, иш берувчи қандай қилиб бундай техникаларни ишлатишни билмаган ва тажрибаси йўқ кишига ишониб топширди?, - дейди Илгиза Якшибаева.
«Ўзим айбдорман, деб ариза ёздиришган»
Миграция-адаптация маркази раҳбарига кўра, ўзбекистонлик муҳожирларни ноқонуний ишлатаётган "ПластЭкоСервис" директори бу фожеадан кейин ишчиларга «Тез ёрдам» чақиришни тақиқлаган. Буни мигрантларни хужжатсиз ишлатаётгани ошкор бўлишини истамагани билан боғлайди фаол.
Шунингдек, иш берувчи Ғулом Пўлатовнинг иш жараёнида жароҳат олганини ҳам рад қилмоқда.
Мазкур ҳодисани Ички ишлар бошқармаси ходимлари ҳам ўрганмоқда, воқеа юзасидан жиноий иш қўзғатилган.
- Полиция келиб Ғулом акадан «оёғимни йўқотишимга ўзим сабабчиман, бу - бахтсиз ҳодиса» деб ариза ёздириб кетган экан. Бизнинг аралашувимиздан сўнг, аризани қайта ёзиб топширдик. Иш берувчи катта жарима тўлашдан ташқари Пўлатовнинг қолиб кетган иш ҳақларини тўлашига ва компенсация ундиришга ҳаракат қилмоқдамиз, - дейди Илгиза Яхшибоева.
Муҳожир Ғулом Пўлатовнинг вазиятидан Ўзбекистоннинг Санкт-Петербургдаги консуллиги хабардор, улар жароҳатланган муҳожирни касалхонага бориб кўрганлар ва иш ҳақини ундириб беришда ёрдам кўрсатишни ваъда қилишган.
Би-би-си консуллик билан боғланишга ва изоҳ олишга уринмоқда. "ПластЭкоСервис" ташкилоти раҳбари Пётр Драгун матбуот ва бошқа ёт шахслар билан суҳбатлашишни рад этди.
Аслида ким ёрдам бериши керак?
Илгиза Якшибаева наманганлик муҳожирга ёрдам бериш учун хайрия акциясини эълон қилган.
- Ғулом акани уйига қайтаришга самолётга йўлкира пулидан ташқари, усти-бош ҳам олишимиз керак. 3 нафар вояга етмаган болалари бор экан, уларга ҳам ёрдам керак. Айниқса, тўпиқсиз қолган оёқларига протез учун ҳаракатдамиз. Протез 250 рубль тураркан, иш ҳақисиз қолганлар, йиғиб қўйган пуллари ҳам йўқки, шундай пайтда асқотадиган - деди Якшибаева.
Марказ раҳбари муҳожирнинг шифохонадан чиқишига Қариялар уйидан вақтинчалик яшаб туришига жой топганини айтади.
- Бу каби вазиятларда консуллик ва Миграция агентлигининг вакиллари кўпроқ ташаббус кўрсатишлари керак, менимча. Аммо мен улар билан неча кундирки, шу иш юзасидан мулоқот қилиб билаяпманки, бу уларга малол келаяпти. Воқеани матбуотда тарқатмасликка, бекитишга уринишаяпти. Ҳатто миграция агентлигини раҳбари мени «ўз манфаати учун пул йиғиш»да айблади. Шу кишига ёрдам бериб уйига эсон-омон жўнатиб олайлик, бундай ҳақоратлардан кейин бошқа ёрдам қилолмасам керак, - дея хафа бўлиб гапирди Якшибаева.
Ҳозир Россияда меҳнат муҳожирлигида банд бўлсангиз, сиз ишлаётган жойда меҳнат хавфсизлиги қоидалари қанчалик таъминланган?
Манба: BBCUZBEK.COM