Францияда касалхона яқинида, АҚШда эса мактабда отишма юз берди, қурбонлар бор

Франция пойтахти Парижда номаълум шахс Анри Дюнан номидаги касалхона яқинида ўт очди, деб ёзади «РБК». ОАВ маълумотларига кўра, отишма Парижнинг 16-округида, Мишел-Анж кўчасида юз берган. Оқибатда бир эркак ва бир аёл яраланган. Улар касалхонага етказилган.

Жароҳат олган аёл касалхонада соқчи бўлиб ишлаган. Тиббий муассасанинг ўзи Франциянинг Қизил Хоч ташкилотига қарашлидир. Кейинроқ ОАВ яраланганлардан бири вафот этганини маълум қилди.

Ўқ узган шахс воқеа жойидан қочиб кетган. Париж полициясига таяниб, хабар беришларича, у велосипедда бўлган (баъзи манбаларда скутер), айни пайтда ёвуз ниятли шахс қидирувга берилган.

АҚШнинг Теннесси штати Ноксвилл шаҳрида жойлашган мактабда ҳам отишма юз берди, оқибатда бир киши ҳалок бўлди, полиция офицери яраланди ва касалхонага етказилди.

Мактабда қуролланган шахс борлиги ҳақида хабарлар келиб тушгач, полиция у ерга етиб борган, гумонланувчи ҳожатхонадан топилган, у биринчи бўлиб ўқ узган, офицерлардан бири унга жавобан ўт очган, оқибатда у воқеа жойида вафот этган. Кейинроқ у мактаб ўқувчиларидан бири бўлгани маълум қилинган.

Шунингдек, отишмани текшириш доирасида бир эркак қўлга олинган, унинг шахси ошкор этилмаган.

Эслатиб ўтамиз, бу АҚШда сўнгги бир ой ичида юз берган тўртинчи отишмадир. Бунгача 16, 22 ва 31 март кунлари ҳам шундай ҳодисалар бўлиб ўтган эди.

31 март куни Калифорния штатининг Оринж округида юз берган отишма оқибатида тўрт киши ҳалок бўлди, бир киши яраланди.

22 март куни Колорадо штатининг Боулдер шаҳридаги супермаркетда 21 ёшли Аҳмат Алисса отишма содир этган, оқибатда 10 киши, шу жумладан, бир нафар полиция ходими ҳалок бўлган. Расмий маълумотларга кўра, гумондор отишмадан олти кун олдин ҳужум қуролини сотиб олган. АҚШ президенти Жо Байден Колорадодаги отишма оқибатида ҳалок бўлганлар хотирасига беш кунлик мотам эълон қилган.

Шунингдек, 16 март куни Жоржияда 21 ёшли Роберт Аарон Лонг томонидан Атланта чеккасидаги массаж салонларига қилинган қуролли ҳужумларда саккиз киши, жумладан, олти осиёлик аёл ўлдирилган.

Колорадодаги отишмадан кейин АҚШ президенти Жо Байден ҳалок бўлганлар хотирасига беш кунлик мотам эълон қилди  ва АҚШ Конгрессини мамлакатда ҳужум қуролларини сотишни тақиқлашга чақирди.

Аввалроқ Жо Байден АҚШ Конгрессига қурол сотишга оид шартларни мураккаблаштиришни таклиф қилгани ҳақида хабар берилганди.

Манба: daryo.uz

• email
• facebook
• twitter

Back to the list