- Bosh (sahifa)
- Xabardor boling
- Yangiliklar
- Германияда Иккинчи жаҳон уруши йилларида ҳарбий лагерларда ҳалок бўлган ўзбекистонликлар хотираси абадийлаштирилади
Германияда Иккинчи жаҳон уруши йилларида ҳарбий лагерларда ҳалок бўлган ўзбекистонликлар хотираси абадийлаштирилади
Ўзбекистоннинг Германиядаги элчихонаси Иккинчи жаҳон уруши йилларида ҳарбий лагерларда ҳалок бўлган ўзбек зобит ва аскарлари тўғрисида маълумотлар йиғиш, қабрларини топиш ва рўйхатини аниқлаш бўйича иш олиб бормоқда. Бу ҳақда «Дарё»га элчихона матбуот хизмати маълум қилди.
Фото: Ўзбекистоннинг Германиядаги элчихонаси
Хусусан, Германиянинг Шимолий Рейн-Вестфалия федерал ери, Штукенброк шаҳарчасида жойлашган «Шталаг 326» ҳарбий асирларга оид маълумотлар маркази ва музейи билан яқин алоқалар ўрнатилди.
Ушбу марказдаги мавжуд маълумотларга кўра, 1941—1945 йилларда бу ерда барпо этилган лагерга келтирилган 42 000 ҳарбий асир орасида 360 нафар ўзбек аскари бўлган. Улардан 35 нафари «Штукенброк» қабристонига умумий ҳолда дафн этилган. Қолган ватандошлар ҳақида ҳозирча маълумот мавжуд эмас.
Фото: Ўзбекистоннинг Германиядаги элчихонаси
Хотира ва қадрлаш куни арафасида, 7 май куни Ўзбекистоннинг Германиядаги элчиси Набижон Қосимов «Штукенброк» ҳарбийлар қабристонига дафн этилган ватандошлар хотирасига ҳурмат бажо келтириш мақсадида бу ерга келди ва уларнинг руҳи учун дуо қилиб, гулчамбар қўйди.
«Шталаг 326» маркази ижрочи директори О.Никель билан суҳбат чоғида ушбу ҳарбийлар қабристонида мангу ором топган юртдошлар хотирасини абадийлаштириш мақсадида ёдгорлик тоши ўрнатиш масаласи ҳам муҳокама этилди.
Фото: Ўзбекистоннинг Германиядаги элчихонаси
Учрашув чоғида биргаликда тегишли ҳужжатлар тайёрлаш ва барча ташкилий масалаларни ҳал этиб, келгуси йил май ойида ўзбек ҳарбийлари дафн этилган мазкур қабристонга хотира тоши қўйиш масаласида келишиб олинди.
Фото: Ўзбекистоннинг Германиядаги элчихонаси
Марказдаги мавжуд архивдан ўзбек ҳарбий асирлари рўйхати, уларга оид сақланиб қолган ҳужжатлардан нусхалар олинди. Аксарият қисми сарғайиб кетган ушбу ҳужжатларда ватандошларнинг расмлари, уларнинг шахсига оид маълумотлар ифода этилган.
Жумладан:
Сафаров Нурали, 1912 йилда туғилган, бўйи 160, оддий аскар, касби деҳқон, отаси Сафар, онаси Қундуз. Манзили —Бухоро вилояти, Бекмаров қишлоғи. 1943 йил 5 мартда вафот этган;
Рузметов Абдурахмон, 1918 йил 3 мартда тугилган, бўйи 180, оддий аскар, касби деҳқон, отаси Рузмет, онаси Зиёда. манзили — Ташкент вилояти, Таркана бекати. 1944 йил 9 июлда вафот этган.
Фото: Ўзбекистоннинг Германиядаги элчихонаси
Ушбу рўйхат ва ҳужжатлар асосида уруш йилларида бедарак кетиб, «Штукенброк» ҳарбийлар қабристонига дафн этилган ватандошларнинг қариндошлари, яқинлари топилса ажаб эмас.
Манба: daryo.uz




