ОАВ: Шри-Ланка ҳукумати “араб баҳори” усулидаги давлат тўнтаришининг олдини олди

Шри-Ланка ҳукумати куни кеча эълон қилинган комендантлик соати даврида 600 дан зиёд кишини қамоққа олди. Бу билан, мамлакатда “араб баҳори” усулидаги ҳукуматни алмаштиришга уринишнинг олди олинди, деб ёзмоқда Colombo Gazette нашри.

"Полициянинг маълум қилишича, Ғарбий провенцияда жами 664 киши ҳибсга олинган. Якшанба куни бутун орол бўйлаб “араб баҳори” усулида норозилик намойишлари ўтказилиши режалаштирилган эди. Шу куни норозилик акцияси бошланмасдан оролда комендантлик соати эълон қилинди", – дейилади хабарда.

Араб баҳори деганда, 2010 йилларда араб дунёсининг катта қисмини эгаллаб олган ҳукуматга қарши норозиликлар ва қуролли исёнлар тушунилади. У илк бор Тунисда коррупция ва иқтисодий турғунликка қарши халқнинг норозилик чиқишлари кўринишида бўлиб ўтган эди. Шундан кейин, норозилик тўлқинлари  Ливия, Миср, Яман, Сурия, Бахрайнни ҳам ўз домига тортди.

Шри-Ланка 1948 йил мустақилликка эришгандан буён энг чуқур  иқтисодий инқирозни бошидан кечирмоқда. Инқироз коронавирус пандемияси даврида сайёҳларнинг мамлакатга келишига чеклов қўйилиши натижасида юзага келган хорижий валютанинг етишмаслиги шароитида  янада чуқурлашди. Хорижий валютанинг етишмаслиги оқибатида мамлакат эҳтиёжига яраша ёқилғи сотиб ололмаяпти.

COVID-19 пандемияси оролнинг туристик соҳасига салбий таъсир кўрсатди. Чунки мамлакатга  келадиган хорижий валюта асосан хорижий сайёҳлар ҳисобига эди. Қолаверса, чет мамлакатларда ишлаётган Шри-Ланка фуқароларидан ҳам пул ўтказмалари ҳажми камайиб кетган.

Манба: uza.uz

• email
• facebook
• twitter

Back to the list